តើវិស័យអចលនទ្រព្យនៅកម្ពុជានឹងមានដំណើរនៅពេលអនាគតយ៉ាងដូចម្តេច?
តើវិស័យអចលនទ្រព្យនៅកម្ពុជានឹងមានដំណើរនៅពេលអនាគតយ៉ាងដូចម្តេច?
ដោយ ប៊ី
ភ្នំពេញៈ អ្នកជំនាញនៅក្នុងវិស័យអចលនទ្រព្យកម្ពុជា នៅតែបង្ហាញពីសុទិដ្ឋិនិយមចំពោះវិស័យអចលនទ្រព្យកម្ពុជា ខណៈវិស័យលំនៅដា្ឋន វិស័យដីធ្លី និងប្រតិបត្តិការទិញ និងជួលនឹងបន្តមានដំណើរការយ៉ាងសកម្មនៅពេលអនាគត។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មើលឃើញថា តម្លៃអចលនទ្រព្យនឹងបន្តឡើងថ្លៃពី១០% ទៅ ១៥% ប្រចាំឆ្នាំ ដោយផ្នែកលើ កត្តាចំនួន៣ ក្នុងនោះរួមមាន វិស័យលំនៅដា្ឋន វិស័យដីធ្លី និងប្រតិបត្តិការទិញ និងជួល ដែលនឹងបន្តមានដំណើរការយ៉ាងសកម្មនៅពេលអនាគត។
តម្លៃអចលនទ្រព្យធៀបនឹងប្រទេសជិតខាង
អ្នកជំនាញជាច្រើនបានមើលឃើញស្រដៀងគ្នាថា កម្ពុជាមានកម្រិតតម្លៃអចលនទ្រព្យទាបនៅឡើយ បើធៀបនឹងប្រទេសជិតខាង ដូចជា៖ ប្រទេសថៃ វៀតណាម និងបណ្ដាប្រទេសផ្សេងៗនៅក្នុងតំបន់អាស៊ាននេះ។
លោកខន គង្គារ អគ្គនាយកក្រុមហ៊ុនភ្នាក់ងារអចលនទ្រព្យ ERA ប្រចាំកម្ពុជា ធ្លាប់បានលើកឡើងថា តម្លៃអចលនទ្រព្យនៅកម្ពុជាបន្តកើនឡើងជានិច្ច ប៉ុន្តែបើប្រៀធៀបនឹង ប្រទេសជិតខាង តម្លៃនេះនៅតែមានកម្រិតទាបនៅឡើយ។
ជាក់ស្តែង នៅ សិង្ហបុរីខុនដូមានតម្លៃ១៦,០០០ ដុល្លារទៅ១០០,០០០ ដុល្លារក្នុងមួយម៉ែត្រការ៉េ។ ខុនដូនៅ វៀតណាមមានតម្លៃពី៣,៥០០ ទៅ ៥,០០០ដុល្លារក្នុងមួយម៉ែត្រការ៉េ។ នៅភូមាមានតម្លៃពី៣,៤០០ ដុល្លារឡើងទៅ និងថៃមានតម្លៃមធ្យមចាប់ពី ៥,០០០ដុល្លារឡើងទៅ។
តម្លៃខុនដូនៅកម្ពុជា
លោកស្រី អាន សុធីតា នាយិកាក្រុមហ៊ុន CBRE Cambodia បានលើកឡើងថា នៅក្នុងឆ្នាំ២០១៩ ខុនដូតម្លៃសមរម្យមានតម្លៃចន្លោះពី១,២០០ ទៅ១,៥០០ដុល្លារឡើងទៅក្នុងមួយម៉ែត្រការ៉េ និងខុនដូថ្នាក់កណ្តាលមានតម្លៃពី១,៥០០ ទៅ២,៥០០ដុល្លារជាងក្នុងមួយម៉ែត្រការ៉េ និងខុនដូតម្លៃខ្ពស់មានតម្លៃចាប់ពី៣,០០០ ដុល្លារ/ម៉ែត្រការ៉េ។
យោងតាមរបាយការណ៍របស់ CBRE Cambodia បានបង្ហាញថា ឆ្នាំ២០២០នេះវិញ CBRE Cambodia រំពឹងថា ទីផ្សារខុនដូ នឹងកើនឡើង៥៥ភាគរយ ក្នុងនោះទីផ្សារខុនដូតម្លៃសមរម្យ (affordable) មានភាពទាក់ទាញខ្លាំងជាងគេ ក្នុងចំណោមអតិថិជនក្នុងស្រុក។
តម្រូវការលំនៅដ្ឋាននៅកម្ពុជា
បើនិយាយអំពីតម្លៃផ្ទះទូទៅវិញ មិនថាវីឡាឬផ្ទះក្នុងបុរីនោះទេ គឺនៅមិនទាន់ឈានដល់កម្រិតខ្ពស់បំផុតនៅឡើយ ស្របពេលដែលតម្រូវការសរុប ត្រូវបានគេប៉ាន់ស្មានថាមានប្រមាណជាង៨០ម៉ឺនខ្នង គិតចាប់ពីឆ្នាំ២០១៥ ដល់ឆ្នាំ២០៣០ ពោលគឺប្រមាណជាង៥ម៉ឺនខ្នងក្នុងមួយឆ្នាំៗ នេះបើយោងតាមរបាយការណ៍របស់ ក្រសួងរៀបចំដែនដី នគរូបនីយកម្ម និងសំណង់។
លោកឧកញ៉ាតេង រិទ្ធី ស្ថាបនិកក្រុមហ៊ុន R’ Investment Group បានលើកឡើងថា តម្រូវការបានធ្វើឲ្យតម្លៃអចលនទ្រព្យ មានសន្ទុះខ្លាំងពីមួយឆ្នាំទៅមួយឆ្នាំ។ លោកបានពន្យល់ថា ដោយសារកំណើនសេដ្ឋកិច្ចទើប ធ្វើឱ្យអ្នកទិញមានលទ្ធភាពទិញលំនៅ ដ្ឋាន។
ក្នុងចំណោមផ្ទះទាំងអស់ ផ្ទះតម្លៃសមរម្យ ដែលមានតម្លៃក្រោម៥ម៉ឺនដុល្លារ នឹងមានតម្រូវការច្រើនជាងគេ ដោយមូលហេតុថា ប្រជាជនមួយផ្នែកធំជាអ្នកមានចំណូលមធ្យម។
យោងតាមការស្ទង់មតិអចលនទ្រព្យឆ្នាំ២០១៩ របស់ Realestate.com.kh ក្នុងចំណោមអ្នកផ្តល់ចម្លើយជាង២០០០នាក់ បានបង្ហាញថា ប្រហែល៤០%នៃអ្នកផ្ដល់ចម្លើយទាំងអស់ ចាប់អារម្មណ៍ចង់ទិញផ្ទះតម្លៃក្រោម៥ម៉ឺនដុល្លារ និងមាន២៦% ចាប់អាម្មណ៍ទិញផ្ទះតម្លៃ៥ម៉ឺន ទៅ៧.៥ ម៉ឺនដុល្លារ៕
The post តើវិស័យអចលនទ្រព្យនៅកម្ពុជានឹងមានដំណើរនៅពេលអនាគតយ៉ាងដូចម្តេច? appeared first on Best Real Estate News in Cambodia.
Source: Real Estate – property area