News | advice | area guide

Property news, market trends and advice for property buyers and renters and plus Cambodia Area guide

រដ្ឋាភិបាលថៃគ្រោងចំណាយ២១ពាន់លានដុល្លារពង្រីកការដឹកជញ្ជូនតាមផ្លូវដែក នៅទីក្រុងបាងកក


រដ្ឋាភិបាលថៃគ្រោងចំណាយ២១ពាន់លានដុល្លារពង្រីកការដឹកជញ្ជូនតាមផ្លូវដែក នៅទីក្រុងបាងកក

ដោយវុត្ថា

បាងកកៈ រដ្ឋាភិបាលថៃគ្រោងចំណាយប្រាក់ រហូតដល់ជាង២១ពាន់លានដុល្លារដើម្បីពង្រីកការដឹកជញ្ជូនតាមរថភ្លើងនៅទីក្រុងបាងកក ដោយពង្រីកខ្សែរថភ្លើង និងសា​ងសង់ផ្លូវរថភ្លើងល្បឿនលឿន ជាមួយនឹងស្ថានីយ៍តម្លៃ១,៣ពាន់លានដុល្លារ ដែលនឹងក្លាយជាស្ថានីយ៍រថភ្លើងធំជាងគេនៅអាស៊ីអាគ្នេយ៍ នៅពេលដែលគំរោងនេះ បើកដំណើរការនៅឆ្នាំ២០២១ ។

យោងតាមការចុះផ្សាយរបស់សារព័ត៌មាន Bloomberg កាលពីថ្ងៃទី ១ ខែមីនា ឆ្នាំ ២០២០ កន្លងមកនេះឱ្យដឹងថា  ផែនការនេះ គឺជាផ្នែកមួយនៃវិធានការរបស់រដ្ឋាភិបាលដើម្បីបន្ធូរបន្ថយការបំពុលបរិយាកាសនៅក្នុងទីក្រុង។ ផ្សែងហុយចេញពីយានយន្តប្រើហ្គា​ស ក៏ដូចជាម៉ាស៊ីន បានបង្កឱ្យមានផ្សែងអ័ព្ទ ដ៏គ្រោះថ្នាក់ដល់ទីក្រុងបាងកក និងផ្នែកខ្លះ នៃប្រទេសក្នុងរយៈពេលជាច្រើនខែកន្លងមកនេះ។

លោក Somprawin Manprasert ប្រធានសេដ្ឋវិទូនៅធនាគារ Bank of Ayudhya Pcl បានឱ្យដឹងថា ការពង្រីវិស័យដឹកជញ្ជូនតាមរថភ្លើងនេះ វាជាការល្អសម្រាប់សេដ្ឋកិច្ច និងបរិស្ថានរបស់ប្រទេសក្នុងរយៈពេលវែង។ បញ្ហាបំពុលបានបង្ហាញថា យើងបានឈានដល់ចំណុចមួយ ដែលត្រូវចាប់ផ្តើមធ្វើសកម្មភាព កុំឱ្យយើងមានបញ្ហាទៅថ្ងៃក្រោយ។

មហិច្ឆតាផ្លូវដែករបស់ប្រទេសថៃ មិនត្រឹមតែជាឧបករណ៍ ដើម្បីកាត់បន្ថយការប្រើប្រាស់ឥន្ធនៈផូស៊ីលប៉ុណ្ណោះទេ ប៉ុន្តែថែមទាំងជួយជំរុញឱ្យសេដ្ឋកិច្ចរីកចំរើនផងដែរ តាមរយៈការកែប្រែប្រព័ន្ធរថភ្លើង និងទប់ទល់រូបិយប័ណ្ណរបស់ខ្លួន។

បណ្តាញផ្លូវដែក គឺជាគម្រោងហេដ្ឋារចនាសម្ព័ន្ធដ៏លេចធ្លោមួយ ដែលត្រូវបានគេមើលឃើញថា ជាការគាំទ្រដ៏សំខាន់សម្រាប់សេដ្ឋកិច្ច បណ្តាលមកពីគ្រោះរាំងស្ងួតធ្ងន់ធ្ងរ និងការធ្លាក់ចុះនៃវិស័យទេសចរណ៍ ដែលបណ្តាលមកពីការផ្ទុះឡើងនៃវីរុសកូវីដ១៩។

រដ្ឋាភិបាលថៃបានអនុម័តថវិកា សម្រាប់គម្រោងហេដ្ឋារចនាសម្ពន្ធ័ ដែលមានទឹកប្រាក់៣៣ពាន់លានដុល្លារ ក្នុងរយៈពេល៣ឆ្នាំខាងមុខ ដែលនឹងត្រូវចំណាយលើគម្រោងផ្លូវដែក ក្នុងគោលដៅទាក់ទាញវិនិយោគឯកជន និងជំរុញការប្រើប្រាស់សេវាសាធារណៈ ខណៈប្រទេសថៃមានកំណើនសេដ្ឋកិច្ចទាបបំផុត ក្នុងរយៈពេល៥ឆ្នាំកន្លងមកនេះ។

លោកVoravuth Mala អភិបាលស្តីទីនៃផ្លូវដែករដ្ឋរបស់ថៃ បាននិយាយនៅក្នុងបទសម្ភាសន៍មួយកាលពីពេលថ្មីៗនេះឱ្យដឹងថា នេះគឺជាពេលវេលាដ៏ល្អបំផុត ក្នុងការវិនិ​យោគលើហេដ្ឋារចនាសម្ព័ន្ធ ខណៈសេដ្ឋកិច្ចពិភពលោកមានភាពទន់ខ្សោយ ហើយមានអត្រាការប្រាក់ទាប។

លោកថា “ប្រសិនបើប្រជាជនអាចធ្វើដំណើរបានលឿន និងងាយស្រួល នោះសេដ្ឋ​កិច្ចនឹងល្អ ហើយវាគឺជាគំនិតដែលយើងបង្កើតឡើង”។

ការអភិវឌ្ឍផ្លូវដែកនេះ នឹងបង្កើនសមត្ថភាពដឹកអ្នកដំណើររបស់ប្រទេស កើនឡើ​ងទ្វេដង និងបង្កើនសមត្ថភាពដឹកទំនិញទ្វេដង តាមរយៈផ្លូវដែកនេះ។ បន្ថែមពីនេះការអភិវឌ្ឍផ្លូវដែកនេះ នឹងអាចបម្រើដល់អ្នកដំណើរ ជាង២២លាននាក់ក្នុងមួយឆ្នាំៗ និងដឹកជញ្ជូនទំនិញជាង៣០លានតោន។

សម្រាប់ផ្លូវដែកល្បឿនលឿន នឹងតភ្ជាប់ទីក្រុងសំខាន់ៗរបស់ថៃ ទៅកាន់ទីក្រុងបាងកក ដែលជាទីក្រុងមួយដែលមានប្រជាជន១០លាននាក់ និងភ្ញៀវទេសចរ២០លាននាក់ ជាមួយនឹងចំនួនខ្សែប្រព័ន្ធដឹកជញ្ជូនឆ្លងកាត់ នឹងកើនឡើងទ្វេរដងផងដែរ៕

The post រដ្ឋាភិបាលថៃគ្រោងចំណាយ២១ពាន់លានដុល្លារពង្រីកការដឹកជញ្ជូនតាមផ្លូវដែក នៅទីក្រុងបាងកក appeared first on Best Real Estate News in Cambodia.

Source: Real Estate – property area