អាគារកប់ពពកនៃគម្រោងOlympia Cityត្រៀមបង្ហាញខ្លួនពេញលេញ នៅចុងឆ្នាំ២០២១
អាគារកប់ពពកនៃគម្រោងOlympia Cityត្រៀមបង្ហាញខ្លួនពេញលេញ នៅចុងឆ្នាំ២០២១
ដោយគង់ សូរិយា
ភ្នំពេញៈ មជ្ឈមណ្ឌលពាណិជ្ជកម្មកប់ពពក ដែលជាអាគារមេនៃគម្រោងOlympia City កំពស់៣៨ជាន់ និង៥៥ជាន់ បាននិងកំពុងសាងសង់យ៉ាងសកម្ម និងគ្រោងបញ្ចប់គ្រោងអាគារនៅចុងឆ្នាំ២០២១ខាងមុខនេះ បើសិនជាគ្មានអ្វីប្រែប្រួលទេនោះ។
ប្រធានគ្រប់គ្រងគំរោងOlypia City លោកវិស្វករម៉េង ចំរើនបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៧ កុម្ភៈនេះថា អាគារមេនៃគម្រោងOlympia Cityបានសាងសង់់ដល់ជាន់ទី១៨ហើយ នៃគម្រោងកំពស់៥៥ជាន់។ ចំណែកអាគារមេមួយទៀតដែលមានកំពស់៣៨ជាន់ រហូតមកទល់ពេលនេះសាងសង់់បានដល់ជាន់ទី១៥ផងដែរ។
លោកបន្តថា “បើតាមផែនការគ្រោងអាគារនេះ នឹងបញ្ចប់ការសាងសង់នៅចុងឆ្នាំ២០២១ខាងមុខនេះ ដែលសរុបការចំណាយមានប្រមាណ១០០លានដុល្លារ ដែលតម្លៃនេះគិតតែតួអាគារប៉ុណ្ណោះ”។ លោកបន្តថា “អាគារកំពស់៣៨ជាន់់ ត្រូវបានក្រុមហ៊ុនរៀបចំធ្វើជាសណ្ឋាគារកម្រិតផ្កាយ៥ និងអាគារកំពស់៥៥ជាន់ នឹងប្រើប្រាស់ជាការិយាល័យ និងសេវាកម្មអាផាតម៉ិន”។
លោកម៉េង ចំរើនបានបន្តឲ្យដឹងទៀតថា ទោះជាយ៉ាងណាគំរោងនេះ អាចមានការប្រែប្រួល ដោយសារបច្ចុប្បន្នមានក្រុមហ៊ុនវិនិយោគបរេទេស កំពុងចែចូវទិញអាគារទាំងពីរនេះ ប៉ុន្តែការសម្រេចយ៉ាងណា លោកមិនបញ្ជាក់ឲ្យចដឹងលំអិតនៅឡើយទេ។
Olympia Cityជាគម្រោងមួយស្ថិតនៅតំបន់ពាណិជ្ជកម្ម កណ្តាលរាជធានីភ្នំពេញ ក្នុងសង្កាត់វាលវង់ ខ័ណ្ឌ៧មករា រាជធានីភ្នំពេញ។
គំរោងនេះរួមបញ្ចូលនូវផ្សារទំនើប ខុនដូ ការិយាល័យ អាផាតម៉ិន សណ្ឋាគារ ក្លឹបហាត់ប្រាណ Clubជាដើម។
លោកទូច សំណាងអគ្គនាយករងក្រុមហ៊ុនOCIC ដែលជាក្រុមហ៊ុនវិនិយោគគំរោងនេះធ្លាប់បានមានប្រសាសន៍ឲ្យដឹងថា គំរោងនេះត្រូវចំណាយប្រាក់ប្រមាណ៥០០លានដុល្លារអាមេរិក ដែលការចំណាយនេះគឺគិតតែលើតួអាគារ ដោយមិនរួចបញ្ចូលការឌីសាញ និងតម្លៃដីនៅតំបន់នេះនោះទេ។
លោកបន្តថា “គំរោងនេះទទួលបានជោគជ័យរួចហើយ បើគិតមកទល់ពេលនេះដោយសារលក្ខខ័ណ្ឌទីតាំងមានភាពអំណោយផល ដែលបណ្តុំដោយមជ្ឈមណ្ឌលពាណិជ្ជកម្ម ការសាងសង់ដោយផ្តោតលើគុណភាព និងទស្សនវិស័យរួមរបស់ក្រុមហ៊ុន”៕
The post អាគារកប់ពពកនៃគម្រោងOlympia Cityត្រៀមបង្ហាញខ្លួនពេញលេញ នៅចុងឆ្នាំ២០២១ appeared first on Best Real Estate News in Cambodia.
Source: Real Estate – property area